51 il öncə başlanan alternativsiz siyasi yol

Bu gün Ümummilli Lider Heydər Əliyevin Azərbaycana ilk dəfə rəhbərliyə başlamasının 51-ci ili tamam olur. 14 iyul 1969-cu ildən respublikamızda başlanan Heydər Əliyev siyasəti sovet illərində Azərbaycanın yüksəlişinə, sonrakı dövrdə müstəqilliyimizin təmin olunmasına, müasir dövlətimizin yaradılmasına və inkişafına layiqincə xidmət edib.

Milli Məclisin deputatlarının "Azərbaycan" qəzetinə açıqlamalarını dərc edirik: 

Heydər Əliyevin müəyyən etdiyi inkişaf siyasəti layiqincə davam etdirilir

                                

Cavid Osmanov, Milli Məclisin deputatı, YAP Ağdaş rayon təşkilatının sədri

Məzmunundan və mahiyyətindən asılı olmayaraq, istənilən siyasi-iqtisadi və ictimai prosesin xalqın maraqlarına uyğun nəticə verməsi birinci növbədə dövlətin rəhbərinin fəaliyyətindən və qətiyyətindən asılıdır. Lakin mübarizələr yolu keçmiş dövlətlərin, eləcə də Azərbaycanın tarixi göstərir ki, müdrik və uzaqgörən siyasətçilər həm də tarixin gərdişini öz ölkələrinin və xalqlarının ümummilli maraqlarına uyğun dəyişməyi bacarırlar.

Bu gün müasir Azərbaycanda ilk dəfə rəhbərliyə başlamasının növbəti ildönümü tamam olan Heydər Əliyev məhz belə, yəni tarixi inkişaf proseslərinin öx xalqının maraqlarına uyğun təmin etməyi bacaran görkəmli dövlət xadimi idi.

Ulu Öndərin xalqımız və dövlətimiz qarşısındakı əvəzolunmaz missiyası 1969-cu ilin 14 iyul tarixindən başlayır. Sovet hakimiyyəti dövrünün məlum tələblərinə, sərt ideoloji rejimə baxmayaraq, Ulu Öndər ilk gündən öz fəaliyyəti ilə mövcud stereotipləri alt-üst etmiş və vətəndaşlar ölkədə pozitiv dəyişikliklərə doğru dönüşün əsasının qoyulduğunu hiss etməyə başlamışdılar. Sovet dövrünün siyasi-ideoloji çətinliklərinə rəğmən Ulu Öndərin tamamilə yeni idarəçilik metodları, problemlərin həllinə fərqli baxışları, mütərəqqi kadr siyasəti ilə ölkənin inkişafına və yüksəlişinə xidmət edən fəaliyyət nümunəsi ortaya qoyması ilk gündən cəmiyyəti ruhlandırmışdı. Tezliklə Azərbaycanda bütün sahələrdə baş verən irəliləyiş, respublikamızın iqtisadi inkişaf göstəricilərinə görə ittifaq miqyasında qabaqcıl yerlərə çıxması nəticəsində ictimaiyyət Heydər Əliyevin əsl quruculuq missiyası ilə xalqa rəhbərliyinin şahidi oldu. Qısa zaman kəsiyində Azərbaycan keçmiş sovet ittifaqının tərkibində o zaman üçün müasir iqtisadi potensiala malik olan respublikaya çevrildi. Bu gün də Azərbaycanın iqtisadi həyatına böyük töhfələr verən bir sıra zavod və müəssisələr məhz Heydər Əliyevin uzaqgörənliyi və təşəbbüsləri ilə ölkəmizdə yaradılmışdı.

Xalqımızın böyük oğlu öz tarixi missiyasını yalnız iqtisadi inkişaf məsələləri ilə yekunlaşdırmadı. Ulu Öndər öz misilsiz əməlləri ilə həm də xalqımızı mənəvi yüksəlişə ruhlandırdı. Qeyd etdiyim kimi, sərt sovet ideologiyasına baxmayaraq, xalqımızın milli dəyərlərini, hər bir azərbaycanlının milli heysiyyətini gücləndirmək, şanlı keçmişimizi, soy-kökümüzü unutmamaq üçün mühüm tədbirlər həyata keçirdi.

Tarixi hadisələrin sonrakı gedişi də sübut etdi ki, Heydər Əliyevin 1969-1982-ci illərdə gördüyü işlər gələcəkdə milli dövlətçilik ideyalarının hərəkətverici qüvvəyə çevrilməsi və cəmiyyətin bu ideya ətrafında səfərbər olması üçün şərait yaratdı. Həmin dövrdə respublikada bərqərar edilən əsl işgüzarlıq mühiti, sosial ədalətə əsaslanan sağlam mənəvi-psixoloji ab-hava iqtisadi tərəqqinin yüksək həddə çatmasına, Azərbaycanın keçmiş ittifaq miqyasında nüfuz qazanmasına, hətta beynəlxalq səviyyədə tanınmasına imkan verdi.

SSRİ-nin dağılmasından sonra bütün respublikalar müstəqil oldular. Azərbaycan xalqı isə müstəqilliyə qanı bahasına nail oldu. Digər xalqlardan fərqli olaraq, mərd oğul və qızlarımız bu azadlıq uğrunda canını, qanını verdi. Lakin müstəqilliyimizin ilk illərində hakimiyyətdə olan iqtidarların yarıtmaz siyasəti nəticəsində Azərbaycan yenidən əsarət altına düşməyə, hətta parçalanmağa yaxın idi. Hakimiyyət çəkişmələri torpaqlarımızın azadlığı uğrunda aparılan müharibəni də ikinci plana salmışdı.

Məhz belə bir vaxtda xalqın harayına səs verib hakimiyyət sükanının arxasına keçən Heydər Əliyev növbəti dəfə öz tarixi missiyasını həyata keçirdi. Bəli, məhz Heydər Əliyevin sayəsində Azərbaycanın müstəqilliyi xilas olundu, xalqımızın bir daha əsarət altına düşməsinə imkan verilmədi. Xilaskarlıq, daha sonra isə dövlət quruculuğu missiyasını böyük uzaqgörənliklə, siyasi müdrikliklə yerinə yetirən Heydər Əliyev müasir Azərbaycan dövlətinin banisinə çevrildi.

Bu gün Azərbaycan tarixinin ən parlaq dövrünü yaşayır. Təsadüfi deyil ki, respublikamız iqtisadi imkanlarına görə Cənubi Qafqazın aparıcı dövlətidir. Regionla bağlı bütün qlobal iqtisadi təşəbbüslərin mərkəzində Azərbaycan dayanır, İlham Əliyevin sayəsində bütün tranzit marşrutlar ölkəmizdən keçir.

Ölkəmizin ən mühüm nailiyyətlərindən biri də Prezident İlham Əliyevin Ulu Öndərin müəllifi olduğu neft strategiyasını uğurla davam etdirməsi və yeni mərhələyə qaldırmasıdır. İlham Əliyevin lider qətiyyəti ilə Heydər Əliyevin neft strategiyası məntiqi sonluğuna çataraq Xəzər neftini dünya bazarlarına çıxardı. Bu gün neftdən gələn gəlirlər dövlətimizin inkişafına və xalqımızın rifahının yüksəlməsinə xidmət edir. Eyni zamanda İlham Əliyev Xəzərdən hasil olunan mavi yanacağın Avropa bazarlarına çıxarılmasını təmin etməklə Ulu Öndərin əsasını qoyduğu enerji siyasətini daha da inkişaf etdirir.

İlham Əliyevin həyata keçirdiyi siyasi kurs nəticəsində son 17 ildə Azərbaycanın bütün bölgələri inkişaf edib, abadlaşıb. Ən mühüm nailiyyətlərdən biri də bütün vətəndaşların sosial rifahının dəfələrlə yaxşılaşdırılmasıdır. Nəhayət, son aylarda baş verən koronavirus pandemiyası bir daha göstərdi ki, Azərbaycan, sözün əsl mənasında, güclü dövlətdir. Çünki qlobal reallıqlar təsdiq edir ki, hər dövlət COVID-19-la təkbaşına mübarizə apara bilmir. Bunu 150-dən artıq dövlətin kömək üçün Ümumdünya Səhiyyə Təşkilatına müraciəti də göstərir.

Heydər Əliyevin ən böyük arzuları Azərbaycanın daha güclü dövlətə çevrilməsi, xalqımızın rifahının yüksəlməsi idi. Ulu Öndərin müəyyən etdiyi inkişaf konsepiyasının əsasında da məhz bu amillər dayanırdı. Yuxarıda qeyd olunanlar və ümumilikdə, 2003-cü ildən sonra Azərbaycanda həyata keçirilən siyasətin nəticələri Heydər Əliyevin arzularının və qarşıya qoyduğu vəzifələrin həyata vəsiqə aldığını göstərir. Ölkəmizdəki bütün pozitiv yeniliklər və inkişaf göstərir ki, Azərbaycan Prezident İlham Əliyevin rəhbərliyi ilə inamla gələcəyə doğru addımlayır.

Tariximizin Heydər Əliyev dövrü

             

    Müşfiq Məmmədli,  Milli Məclisin deputatı

İyulun 14-də xalqımızın Ümummilli Lideri Heydər Əliyevin Azərbaycanda ilk dəfə siyasi hakimiyyətə gəlişinin 51-ci ildönümü tamam olur. Məhz 1969-cu ilin bu tarixindən gələcəyin qüdrətli Azərbaycan dövlətinin, xalqımızın milli intibahının, sosial tərəqqisinin təməli qoyuldu. Həmin gündən indi barəsində qürur hissi ilə bəhs etdiyimiz Heydər Əliyev epoxası başladı.

Bəli, Ulu Öndərin Azərbaycana rəhbərliyə başladığı həmin gün dövlətçilik tariximizdə dinamik, hərtərəfli inkişaf və intibah mərhələsinin başlanğıcı sayılır. Məhz həmin dövrdən respublikamızda başlanan siyasi kurs, həyata keçirilən işlər Azərbaycanda böyük sosial-iqtisadi, elmi və ədəbi-mədəni inkişafa yol açdı. Sovet rejiminin sərt qanunlarına baxmayaraq, qısa zaman kəsiyində Ulu Öndər Heydər Əliyevin rəhbərliyi altında Azərbaycanda bütün sahələrdə, o dövrlərdə digər respublikaların rəhbərlərinin cəsarət etmədiyi, addımlar atıldı. Heydər Əliyevin ölkənin inkişafı naminə təşəbbüsləri, ideyaları, novatorluğu, quruculuq əzmi o dövrün reallıqları ilə müqayisədə ölkədə cəsarətli bir inkişaf siyasətinin başlanması demək idi.

Heydər Əliyevin yüksək təşkilatçılığı, bacarığı, yorulmaz fəaliyyəti sayəsində Azərbaycanda iqtisadiyyatın bütün sahələrində vüsətli dəyişikliklər baş verdi və ölkəmiz ittifaq büdcəsindən dotasiya almadan yaşayan respublikalardan birinə çevrildi. O dövrdə yaradılan güclü iqtisadi potensial bu gün də müstəqil ölkəmizə xidmət edir.

Ulu Öndərin tarixi xidmətləri sayəsində xalqımızın mənəvi dəyərlərinin qorunmasına xidmət edən genişmiqyaslı tədbirlərin həyata keçirilməsi insanlarda milli ruhun və özünüdərkin oyanışını şərtləndirdi. Bu baxımdan Ulu Öndərin sovet hakimiyəti dövründə Azərbaycana rəhbərliyini ölkəmizin milli-mənəvi yüksəliş mərhələsi kimi də xarakterizə etmək olar. Sözün bütün mənalarında həmin illərdə Azərbaycan xalqı özünə inamını bərpa etdi, manqurtlaşmaqdan, yad mədəniyyətlərin təsirindənn tam xilas oldu. Xalqın milli-mənəvi və mədəni dəyərləri özünə qaytarıldı. Və əlbəttə ki, bütün bunların hamısı Heydər Əliyevin sayəsində mümkün oldu. O zamanlar milli düşüncə sahibi olduqlarına görə təqib edilən ziyalıları ən çətin məqamlarda müdafiə etməyi qanı, canı, bütöv ruhu ilə milli köklərə bağlı olan Heydər Əliyev şəxsiyyəti üzərinə götürə bilərdi.

Tarixi reallıqlar təsdiqləyir ki, 1969-cu ildə Heydər Əliyevin Azərbaycanda hakimiyyətə gəlişi ilə çağdaş tariximizdə keyfiyyətcə yeni epoxanın, inkişaf mərhələsinin və ən əsası Azərbaycanı müstəqil dövlət qurmağa doğru aparan böyük yolun başlanğıcı qoyuldu. Heydər Əliyevin Azərbaycana birinci dəfə rəhbərlik etdiyi 1970-80-ci illər respublikamızın quruculuq salnaməsinə ən parlaq səhifələr kimi daxil oldu.

Bu gün öz intibahının yeni mərhələsini yaşayan Sumqayıtın da sovet hakimiyyəti dövründə inkişafı və nəinki keçmiş SSRİ-də, bütün dünyada tanınması Heydər Əliyevin adı ilə bağlıdır. Həmin dövrdə Heydər Əliyevin böyük qayğısı sayəsində şəhər tarixinin ən əlamətdar səhifələri yazılıb. Sumqayıtlılar Ulu Öndərin xüsusi diqqət və qayğısını hər zaman hiss ediblər. Şəhərin sosial-iqtisadi inkişafında, sənayenin formalaşmasında, elmin, təhsilin, mədəniyyətin tərəqqisində bu dahi insanın əvəzsiz xidmətləri danılmazdır. Ölkəmizə rəhbərliyi müddətində 16 dəfə Sumqayıtda olan Heydər Əliyevin hər səfəri şəhərin tarixinə mühüm hadisə kimi yazılıb. Ötən il şəhər statusu verilməsinin 70 yaşı tamam olan Sumqayıta məhz Ulu Öndər Heydər Əliyevin birinci dəfə ölkəmizə rəhbərliyi illərində yeni nəfəs verildi.

Azərbaycanın müasir tarixinə nəzər salarkən aydın görünür ki, ölkənin və xalqın ən çətin anlarında Heydər Əliyev ona bəslənilən ümidləri layiqincə doğrulda bilib. Təsadüfi deyil ki, sovet illərində olduğu kimi müstəqillik dövründə də məhz Heydər Əliyevin sayəsindən Azərbaycan bütün təbəddülatlardan xilas olmağı bacardı. Bu mənada ötən ay 27-ci ildönümünü qeyd etdiyimiz Milli Qurtuluş Günü müasir tariximizə Heydər Əliyev epoxasının əlamətdar hadisələrindən biri kimi düşdü. Əgər Ulu Öndər 1993-cü ildə xalqın təkidli çağırışlarını qəbul etməsəydi, indi nə müstəqil dövlətimiz vardı, nə də firavan yaşayışımız. Heydər Əliyev hakimiyyətə qayıdandan müasir Azərbaycan dövlətçiliyini qurdu, yaşatdı. Ulu Öndər ağır döyüşlərin getdiyi cəbhə bölgələrinə, səngərlərə baş çəkirdi, hərbçilərin problemləri ilə yerindəcə tanış olurdu, respublikamızın bütün regionlarına, eləcə də xarici ölkələrə səfərlər edirdi, islahatlar aparırdı, yorulmadan çalışırdı. Bu tükənməz enerji, dərin siyasi təcrübə sayəsində yeni, müasir Azərbaycan dövləti quruldu.

Aradan ötən illər bizə Heydər Əliyev fenomeninin milli dövlətçilik qarşısındakı əvəzsiz xidmətlərini mahiyyəti üzrə daha dərindən dərk etmək imkanı verir. Biz bu gün Azərbaycanın qürurverici yüksəlişindən söz açanda uğurlarımıza yol açan strategiyanın müəllifi olan Ulu Öndər Heydər Əliyevi ehtiramla anırıq. Azərbaycana ilk dəfə rəhbərliyə başlamasının 51-ci ildönümündə biz Heydər Əliyevin xalqımız və dövlətimiz qarşısındakı xidmətlərinə nəzər salır və bir daha görürük ki, tariximizin Heydər Əliyev dövrü müasir Azərbaycan dövlətçiliyinin əsaslarının yaradılması, dövlət müstəqilliyimizin təmin olunması və yüksəlişi mərhələsidir.

Bu gün Heydər Əliyev öz ideyaları ilə, xalqımızın və dövlətimizin inkişafına xidmət edən siyasi kursunun davam etdirilməsi ilə milyonların qəlbində yaşayır. Ulu Öndərin müəllifi olduğu inkişaf strategiyasının Prezident İlham Əliyev tərəfindən inamla həyata keçirilməsinin nəticəsi olaraq ötən 17 ildə Azərbaycanın dövlət müstəqilliyi daha da möhkəmləndirilib, respublikamız beynəlxalq aləmdə nüfuzlu söz sahibinə çevrilib, ölkədə tarazlı və davamlı inkişaf təmin olunub.

Heydər Əliyevin siyasi kursunun ən layiqli davamçısı kimi Prezident İlham Əliyev bütün sahələrdə inkişafa nail olmaqla Azərbaycanı Ulu Öndərin müəyyən etdiyi hədəflərə çatdırır. Dövlət müstəqilliyimizin daha da möhkəmləndirilməsi, Azərbaycanın regionun liderinə, dünya miqyasında isə söz sahibinə çevrilməsi bu siyasətin alternativsizliyini təsdiq edir.